「新傳五十．張佬擺大壽」

中大張佬賀五十大壽 巨型花牌恭迎校友
明報 港聞  2015年10月31日

【明報專訊】中大學生近排行上新亞書院，會突然發現新亞巴士總站嘅「小百萬大道」（即通往錢穆圖書館嘅廣場）入口，多咗個兩三層樓高嘅花牌，有成8米闊，橫跨整條「小百萬」，驟眼睇以為新亞變咗新界圍村打醮！

Emily睇真啲，花牌中央4個大字寫住「張佬大壽」，原來今年係中大新聞與傳播學院50歲生日，因此學院今日就搞大型慶祝活動，廣邀校友由朝玩到晚。

學院院長馮應謙同Emily講，今次50周年主題，係為新傳學院搞一場中式賀壽，因此諗出製作一個大花牌，迎接校友之餘可以畀人影吓相同「些牙」，因此佢哋搵咗元朗「花牌大王」李炎記花店幫手製作，花費約萬元，可以擺放一星期。

另 外，「小百萬」會有歡樂攤位，校友可重溫舊地，去即時留影攤位影相，又或購買學院明信片、郵票和紀念品。「新傳五十．張佬擺大壽」晚會有港式懷舊食物，好似砵仔糕、雞蛋仔和雪糕車等招呼校友，不過就唔係大魚大肉式嘅宴會，馮應謙話安排懷舊食物係想配合主題，亦等校友畀150蚊就有得玩有得食，唔使太貴。作 為新傳校友嘅Rubberband歌手六號，同埋方健儀等一班校友主播亦會喺晚會表演助興。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

中大張佬大壽
AM730 | 2015-11-02 | Newspaper | A12  |  Ray手記  |   By Ray

中 文大學新聞傳播學院慶祝五十周年大壽，前日在中大山頂新亞書院大搞一場，有近千人參加，個名好特別，叫做「新傳五十，張佬大壽」(取其 journalism諧音)，由天光慶祝到天黑，現場見到好多香港傳媒同公關傳訊人，由70年代到近年紅人都有，多到Ray數唔都切，集郵都好忙下，例如 近期人氣鼎盛嘅方東昇，自然成為眾人的「集郵目標」，Ray也不執輸，即時同呢位無記之寶合照，方師弟在無記已十八年，雖不能說人到中年，但始終都應該臉 上多少有D風霜，但今次見佢真人，發覺佢還是一副孩子臉，真的有如吃了防腐劑。而且人又相當斯文有禮，簡直係男神之選。

活動亦有學術成分，由多屆系主任同院長出山主講，題目叫「新聞與傳播可以點教？」，氣氛熱烈，Ray亦要認真學習下。至於晚會節目豐富，首先有70年代校友話當年，繼續由方健儀及盤翠瑩等講下女主播趣事，亦有李敏同魏綺珊講下新聞以外的發展……

講 番香港新聞界，讀者可能未必完全了解新聞人才的四大搖籃。中大、浸大、樹仁同珠海，四家學府可說是香港新聞界的四大門派，而據Ray的非正式統計同記憶， 前兩家培養了大量電子傳媒人、公關專業人員，而後兩者就出了不少報紙、雜誌的好手，而香港新聞界，應該超過九成從業員，都同呢四大派或多或少有點淵源。

投身傳媒工作多年，由市場研究做起，一直與公關、廣告、新聞界結下不解緣，心境永遠青春。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

中大新傳50大壽 方東昇被集郵
Sing Tao Daily | 2015-11-02 | Newspaper | A14 | 每日雜誌 | 維港會

中文大學新聞與傳播學院迎來五十大壽，校方前日在新亞書院擺咗場「壽宴」，入口處的巨形中式花牌，先聲奪人，成為必影景點。另一「景點」，必數近期大紅的無綫主播方東昇，他走過俗稱「小百萬大道」的通道時不斷被「集郵」，就好似明星行紅地毯一樣，每行兩步停一停被叫合照。

同方東昇分屬同學兼老友的方健儀，都在fb上載同方東昇的合照（見圖），短短一日有近七千個like，令方健儀大叫：「有冇搞錯？方東昇有乜理由有咁大吸引力？」不過她亦不輸蝕，一身橙裙打扮非常搶鏡，點知院長馮應謙一套紅色西裝，立即將她比下去。

「壽 宴」有近千人出席，包括運輸及房屋局副局長邱誠武、才女李敏、前主播張宏艷、魏綺珊等。魏綺珊除了同一班校友表演混聲合唱新疆民歌，還大談那些年的 百厭事，當年同班同學仔趁吐露港公路未開通，走去巡遊一番，因玩得太開心，結果半夜一班人要爬山坡又爬窗返宿舍，被舍監捉到正。